Profesores e nais cooperan en Castroverde en tarefas educativas

Nais axudando aos alumnos. | Foto: EP

O CPI de Castroverde está a desenvolver un programa educativo pioneiro en Galicia que involucra de forma directa ás familias dos escolares en tarefas formativas. Así, un grupo de nais apoia aos docentes en clases de distintas materias para mellorar as competencias do alumnado.

A coordinadora do programa, a profesora María José García, explica que, de modo experimental, esta iniciativa arrincou o curso pasado, con alumnos de primeiro de educación primaria e coa participación activa de seis nais, e estivo centrado na lectura e a escritura. Engade que, ante os bos resultados, a dirección do CPI decidiu seguir traballando este curso cos mesmos nenos, agora en segundo de primaria, e incorporáronse outras dúas nais e unha exalumna ao grupo, que tamén apoia aos nenos coas matemáticas.