A Deputación arranxará accesos para 100 hectáreas de pasteiros en Furís

Besteiro dialoga con Arias.

O presidente da Deputación de Lugo, José Ramón Gómez Besteiro, explicou onte en Castroverde que a institución provincial acondicionará os accesos a 100 hectáreas de pasteiros na parroquia de Furís, para favorecer o labor dos gandeiros que traballan nesta zona.

A Deputación desprazará proximamente ata Castroverde maquinaria do parque móbil para comezar as obras. O obxectivo é, segundo fontes da institución, «que por primeira vez os gandeiros da zona de Furís conten cuns accesos en perfectas condicións que lles permitan reducir custos de produción e rendibilizar mellor o seu traballo».

Furís é a parroquia de Castroverde con máis actividade gandeira. Ten unhas 30 explotacións con máis de 1.000 cabezas de gando. Os veciños decidiron xuntar leiras para as que necesitaban accesos e solicitar a axuda da Deputación para acondicionalos.