Castroverde viviu un cheo na Romaxe de Crentes Galegos

Preto de 3.000 persoas, chegadas de distintos puntos da xeografía galega, desprazáronse onte á área recreativa da Veiga do Olmo, en Castroverde, para asistir á XXXV Romaxe de Crentes Galegos, unha cita organizada polo colectivo Irimia na que se reivindicou a posta en valor do Camiño Primitivo.

Romaxe na Veiga do Olmo. | Foto: Amigos do Patrimonio de Castroverde

Esta romaría, que combina a celebración da fe cristiana coa defensa da lingua e da cultura galegas, arrincou a media mañá, sobre as 11.00 horas, cunha actuación da agrupación local Zuncurrundullo.

Tralo acto de benvida, os asistentes desprazáronse ata A Veiga do Olmo, onde tivo lugar un acto de celebración da palabra que contou coa participación do grupo A Quenlla, unha formación cuxa presenza é habitual dende hai anos na romaría.

Os momentos máis importantes do acto consistiron en:

1.- Referencias a Castroverde, especialmente ao Camiño, Persoeiros e Lugares do noso Castro.

2.- O Camiñante Xesús que nos acompaña e alimenta.

3.- A lenda do reino do Amor.

4.- O Berro Seco.

5.- Entrega do Ramo. A vindeira romaxe será na Magdalena, en Ourense.

6.- Despedida co Himno Galego.